ಸ್ವಾಧೀನ (ದೈವಾವೇಶ)ದಲ್ಲಿರುವವರ ಕುರಿತು ಒಂದು ಅಧ್ಯಯನ (ಮನೋಸಾಮಾಜಿಕ ಯಥಾ ದೃಶ್ಯ ಚಿತ್ರ).

ಸಂಶೋಧನ ವಿಧಾನ:

            ಮೇಲೆ ಹೇಳಿದ ವಿವಿಧ ಸಂಶೋಧನೆಗಳ ಫಲಿತಾಂಶಗಳಿಂದ ನನ್ನ ಮನಸ್ಸಿನಲ್ಲಿ ಇನ್ನೂ ಕೆಲವು ಪ್ರಶ್ನೆಗಳು ಹುಟ್ಟಿಕೊಂಡವು. ಈ ಮಾನಸಿಕ ಅವ್ಯವಸ್ಥೆಯ ಬಗ್ಗೆ ಹಲವಾರು ಪ್ರಶ್ನೆಗಳು ಹಾಗೆಯೇ ಉಳಿದಿರುವುದು ನನ್ನ ಗಮನಕ್ಕೆ ಬಂತು. ಹೀಗಾಗಿ ಈ ಅಧ್ಯಯನದಲ್ಲಿ ಕೆಲವೊಂದು ಇದುವರೆವಿಗೂ ತೃಪ್ತಿಕರವಾಗಿ ಉತ್ತರಿಸಲಾಗದ ಪ್ರಶ್ನೆಗಳನ್ನು ಕೇಂದ್ರೀಕರಿಸಿ ಸಂಶೋಧನಾ ವಿಧಾನವನ್ನು ತಯಾರಿಸಲಾಯಿತು.  ಈ ನಿಟ್ಟಿನಲ್ಲಿ ಅನೇಕ ಸ್ನೇಹಿತರು, ಗುರುಗಳು ನನಗೆ ಸಹಾಯ ಮಾಡಿದರು.  ಕ್ಷೇತ್ರ ಭೇಟಿ, ಅನುಭವಸ್ಥರೊಂದಿಗಿನ ಚರ್ಚೆ, ಸಮಾಲೋಚನೆಗಳು ನನ್ನ ಸಂಶೋಧನಾ ವಿಧಾನವನ್ನು ಪಕ್ವಗೊಳಿಸಲು ನೆರವಾದವು.

ಸಂಶೋಧನೆಗೆ ಆಧಾರವಾದ ಪ್ರಶ್ನೆಗಳ ಮಂಡನೆ:

            ಬುರ್ವಿಗಿನಾನ್ ಮತ್ತು ಇವಾಸ್ಕ್ಯ್ (1977)ರವರು ವಿಶ್ವಾದಾದ್ಯಂತ 488 ಸಮಾಜ/ದೇಶಗಳಲ್ಲಿ ಶೇ.90ರಷ್ಟು ಜನರಲ್ಲಿ ಪ್ರಜ್ಞಾತೀತ ಅವಸ್ಥೆ/ಸ್ವಾಧೀನದಲ್ಲಿರುವವರ ನಮೂನೆ ಅಭಿವೃದ್ಧಿ ಹೊಂದಿದ ಮತ್ತು ಅಭಿವೃದ್ಧಿ ಹೊಂದದೆ ಇರುವ ಎರಡೂ ಪ್ರದೇಶಗಳಲ್ಲಿ ಇಂದಿಗೂ ನಾವು ಕಾಣಬಹುದು ಎಂದಿದ್ದಾರೆ. ಈ ಮೇಲಿನ ಎಲ್ಲಾ ಸಂಗತಿಗಳನ್ನು ಗಮನಿಸಿದರೆ, ಇಂದಿನ ವೈಜ್ಞಾನಿಕ ಯುಗದಲ್ಲಿಯೂ ಶತ-ಶತಮಾನಗಳ ಹಿಂದಿನ ನಂಬಿಕೆ, ಆಚರಣೆ, ನಡವಳಿಕೆಗಳು ಏಕೆ ಕಾಣಿಸಿಕೊಳ್ಳುತಿವೆ? ಒಂದೇ ಸಂಸ್ಕೃತಿಯಲ್ಲಿ ಈ ರೋಗವು ಕೆಲವರಲ್ಲಿ ಕಾಣಿಸಿ ಮತ್ತೆ ಕೆಲವರಲ್ಲಿ ಏಕೆ ಕಾಣಿಸಿಕೊಳ್ಳುವುದಿಲ್ಲ? ಯಾವಾಗ ಜನರು ತಮ್ಮ ತೊಂದರೆ/ಕಾಯಿಲೆಗಳನ್ನು ಸ್ವಾಧೀನತೆಯಿಂದ ಉಂಟಾಗಿದೆಯೆಂದು ಭಾವಿಸುತ್ತಾರೆ? ಆಧುನಿಕ ವೈದ್ಯಕೀಯ ಸೇವೆ ಲಭ್ಯವಿರುವಾಗಲೂ, ಏಕೆ ಜನರು ಸಾಂಪ್ರದಾಯಿಕ ಚಿಕಿತ್ಸಕನ ಮೊರೆ ಹೊಗುತ್ತಾರೆ? ಯಾವ ತೆರನಾದ ಒತ್ತಡಗಳಿಂದ ಜನರು ಈ ಘಟನಾವಳಿಗೆ ಒಳಗಾಗುತ್ತಾರೆ? ಐಚ್ಛಿಕ ಮತ್ತು ಅನೈಚ್ಛಿಕ ವಿಧಗಳು ಹೇಗೆ ಭಿನ್ನವಾಗಿವೆ? ಈ ಘಟನಾವಳಿಗಳ ಚಿಕಿತ್ಸೆಗೆ ಸಾಂಪ್ರದಾಯಿಕ ಚಿಕಿತ್ಸಾ ಕೇಂದ್ರಗಳ ಕೊಡುಗೆಯೇನು? ಈ ಕೇಂದ್ರಗಳಲ್ಲಿ ದೊರಕುವ ಸೇವೆಗಳ ಪರಿಣಾಮ ಏನು?  ಎಂಬ ಪ್ರಶ್ನೆಗಳಿಗೆ ಉತ್ತರಿಸಲು ಈ ಅಧ್ಯಯನದಲ್ಲಿ ವಿಶ್ವಾಸಪೂರ್ಣ ಪ್ರಯತ್ನ ಮಾಡಲಾಗಿದೆ.

ಧ್ಯೇಯೋದ್ಧೇಶಗಳು:

ಸ್ವಾಧೀನಕ್ಕೊಳಗಾದ ವ್ಯಕ್ತಿಗಳ ಸಾಮಾಜಿಕ, ಆರ್ಥಿಕ, ಸಾಂಸ್ಕೃತಿಕ ನಂಬಿಕೆ ಹಾಗೂ ಆಚರಣೆಗಳನ್ನು ಅರಿತುಕೊಳ್ಳುವುದು.

ಈ ಘಟನೆಗಳಿಗೆ ಮುನ್ನ ಅರ್ಥಿ/ಮಾಹಿತಿದಾರರ ಜೀವನದಲ್ಲಿ ಅನುಭವಿಸಿದಂತಹ ಒತ್ತಡಗಳ ಅಧ್ಯಯನ.

ಅರ್ಥಿ ಆರೋಗ್ಯದ ಕುರಿತು ಜ್ಞಾನ ಮತ್ತು ಅವರಿಗೆ ಲಭ್ಯವಿರುವ ಆಧುನಿಕ ವೈದ್ಯಕೀಯ ಸೇವೆಗಳ ಕುರಿತು ಅಧ್ಯಯನ.

ಅರ್ಥಿಗಳ ವರ್ತನೆಯನ್ನು ಅಭ್ಯಸಿಸುವುದು.

ಈ ರೋಗಿಗಳ ಚಿಕಿತ್ಸೆಯಲ್ಲಿ ಸಾಂಪ್ರದಾಯಿಕ ಚಿಕಿತ್ಸಾ ಕೇಂದ್ರಗಳ ಪಾತ್ರವನ್ನು ವಿಶ್ಲೇಷಿಸುವುದು.

ವೃತ್ತಿಪರ ಸಮಾಜಕಾರ್ಯಕರ್ತರ ಪಾತ್ರವನ್ನು ವಿಶ್ಲೇಷಿಸುವುದು.

ಅಧ್ಯಯನದ ಅವಧಿ:

            1985 ರಲ್ಲಿ ನಾನು ಪರಿಚಯದ ಭೇಟಿ ಆರಂಭಿಸಿದೆ. ನಂತರ ಅನೇಕ ಅಧ್ಯಯನ ಸಾಧನಗಳನ್ನು ಪ್ರಯೋಗಿಸಿದೆ.  ಕೊನೆಗೆ ಅಂತಿಮ ಸಂಶೋಧನಾ ಸಾಧನವನ್ನು ತಯಾರಿಸಿದೆ.  ಇದೆಲ್ಲಾ ಕಾರ್ಯವನ್ನು ಮುಗಿಸಲು ಸುಮಾರು ಎರಡು ವರ್ಷಗಳ ಅವಧಿ ಬೇಕಾಯಿತು.  ಈ ದೀರ್ಘ ಕಾಲಾವಧಿಗೆ ಕಾರಣ ನನ್ನ ಅಧ್ಯಾಪಕ ವೃತ್ತಿ ಮತ್ತು ಸಾಧನಗಳ ತಯಾರಿಕೆಯಲ್ಲಿ ಅಳವಡಿಸಿಕ್ಕೊಳ್ಳಬೇಕಾದ ಪರಿಕರಗಳ ಕುರಿತು ಕೈಗೊಂಡ ಕಸರತ್ತು. 1986 ರಿಂದ 1989ರವರೆಗೆ ಮಾಹಿತಿ ಸಂಗ್ರಹಣೆ, ಸಾಹಿತ್ಯ ಪರಿಶೀಲನೆ ಕಾರ್ಯವನ್ನು ಕೈಗೊಳ್ಳಲಾಯಿತು.  ನಂತರ ಪ್ರಬಂಧದ ತಯಾರಿಕೆ, ದತ್ತಾಂಶ ವಿಶ್ಲೇಷಣೆ, ಇತರೆ ಕೆಲಸವನ್ನು ಮುಗಿಸಿ, 1993 ರಲ್ಲಿ ಪ್ರಬಂಧವನ್ನು ಪಿಹೆಚ್.ಡಿ. ಪದವಿಗಾಗಿ ಕನರ್ಾಟಕ ವಿಶ್ವವಿದ್ಯಾಲಯಕ್ಕೆ ಸಲ್ಲಿಸಲಾಯಿತು.

ನಮೂನೆ ಆಯ್ಕೆಯ ತಂತ್ರೋಪಾಯ:

ವಿವಿಧ ಕ್ಷೇತ್ರಗಳ ಪರಿಚಯ ಭೇಟಿ ವೇಳೆಯಲ್ಲಿ ತಿಳಿದ ಮತ್ತೊಂದು ವಿಷಯವೆಂದರೆ ಈ ಕ್ಷೇತ್ರಗಳಲ್ಲಿ ಅಲ್ಲಿಗೆ ಬರುವಂತಹ ಯಾವುದೇ ರೋಗಿಗಳ ಬಗ್ಗೆ ದಾಖಲೆಗಳು ಇರಲಿಲ್ಲ.  ಆದ್ದರಿಂದ ತಿಂಗಳಿಗೆ, ವರ್ಷಕ್ಕೆ, ಎಷ್ಟು ಜನ ಚಿಕಿತ್ಸೆಗೆಂದು ಬರುತ್ತಾರೆ ಎಂಬ ಮಾಹಿತಿ ಸಿಗಲಿಲ್ಲ.  ಹೀಗಾಗಿ ನನ್ನ ನಮೂನೆಯ ಸಂಖ್ಯೆ/ಗಾತ್ರ ಎಷ್ಟಿರಬೇಕೆಂದು ಪೂರ್ವ ನಿರ್ಧಾರ ಮಾಡಲು ಸಾಧ್ಯವಾಗಲಿಲ್ಲ.  ಆದ್ದರಿಂದ ಕ್ಷೇತ್ರ ಕಾರ್ಯಕ್ಕಾಗಿ ಸ್ವತಃ ನಿಗದಿತ ದಿನಗಳಲ್ಲಿ ಆಯಾ ಸ್ಥಳಗಳಿಗೆ ಭೇಟಿಕೊಟ್ಟು ಆ ದಿನ ಬಂದಂತಹ ನನ್ನ ಆಯ್ಕೆಗೆ ಒಳಪಟ್ಟಂತಹ ಮತ್ತು ನನ್ನ ಸಂಶೋಧನೆಗೆ ಸಹಕರಿಸುವಂತಹ ವ್ಯಕ್ತಿ/ಕುಟುಂಬಗಳನ್ನು ಗುರುತಿಸಬೇಕಾಗುತ್ತಿತ್ತು.  ಆದ್ದರಿಂದ ಯಾವುದೇ ಪೂರ್ವಗ್ರಹದಿಂದ ದೂರವಿರಲು ನನ್ನ ಸಂಶೋಧನೆಯ ವ್ಯಾಪ್ತಿಗೆ ಬರುವಂತಹ ವ್ಯಕ್ತಿ(ನಮೂನೆ)ಗಳನ್ನು ಆಯ್ಕೆ ಮಾಡಲು ಕೆಲವೊಂದು ನಿಯಮಗಳನ್ನು ಹಾಕಿಕೊಂಡು ಅದರಂತೆ ಕಾರ್ಯನಿರ್ವಹಿಸಿದೆ..

ಅಧ್ಯಯನದ ಮುಖ್ಯ ತಥ್ಯಾಂಶಗಳು:

            ಇಲ್ಲಿ ಅಧ್ಯಯನದ ತಥ್ಯಾಂಶಗಳನ್ನು ಎರಡು ಭಾಗಗಳಾಗಿ ಕೊಡಲಾಗಿದೆ.  ಭಾಗ -1 ರಲ್ಲಿ ಅರ್ಥಿಗಳ ವೈಯಕ್ತಿಕ ಹಿನ್ನೆಲೆಯಾದ ಅವರ ವಯಸ್ಸು, ಶಿಕ್ಷಣ, ಉದ್ಯೋಗ, ವರಮಾನ, ಕೌಟುಂಬಿಕ ಜೀವನ, ಧಾರ್ಮಿಕ ನಂಬಿಕೆ, ಆಚಾರ, ವಿಚಾರ, ಇತ್ಯಾದಿಗಳ ಬಗ್ಗೆ ಬೆಳಕು ಚೆಲ್ಲಲಾಗಿದೆ. ಭಾಗ -2 ರಲ್ಲಿ ಅರ್ಥಿಗಳ ಮನೋ ಸಾಮಾಜಿಕ ಅಂಶಗಳ ಆಯಾಮಗಳನ್ನು ವಿಶ್ಲೇಷಿಸಲಾಗಿದೆ.

ಭಾಗ - 1

(ಅರ್ಥಿಗಳ ವರ್ಗೀಕರಣದ ಬಗ್ಗೆ ಕಳೆದ ಸಂಚಿಕೆಯಲ್ಲಿ ಸಂಕ್ಷಿಪ್ತವಾಗಿ ತಿಳಿಸಲಾಗಿದೆ)

1. ಪ್ರತಿವಾದಿಗಳ ವಯಸ್ಸು:

  ಗುಂಪು 1ರ (ಐಚ್ಚಿಕ) ಸ್ವಾಧೀನಕ್ಕೊಳಗಾದವರ ವಯಸ್ಸಿಗೂ ಮತ್ತು ಗುಂಪು 2ರ (ಅನೈಚ್ಚಿಕ) ಸ್ವಾಧೀನಕ್ಕೊಳಗಾದವರ ವಯಸ್ಸಿಗೂ ನಡುವೆ ವಯಸ್ಸಿನ ಅಂತರ ಸ್ಪಷ್ಟವಾಗಿರುವುದು ಗೋಚರವಾಗುತ್ತದೆ.   ಯಾಕೆಂದರೆ ಗುಂಪು 2ಕ್ಕೆ ಸೇರಿದ ಬಹಳಷ್ಟು (ಶೇ.48 ಕ್ಕೂ ಮೇಲ್ಪಟ್ಟು ಅರ್ಥಿಗಳು 40 ವರ್ಷಕ್ಕೂ ಮೀರಿದವರಾಗಿದ್ದಾರೆ ಮತ್ತು 19 ವರ್ಷ ವಯಸ್ಸಿನ ಒಳಗೆ ಕೇವಲ ಒಬ್ಬ ಅರ್ಥಿಯಿದ್ದಾರೆ. ಇದಕ್ಕೆ ವಿರುದ್ಧವಾಗಿ ಗುಂಪು 2ರ ಬಹಳಷ್ಟು (ಶೇ. 46ಕ್ಕೂ ಮೇಲ್ಪಟ್ಟು ಪ್ರತಿವಾದಿಗಳು 19 ವರ್ಷ ವಯಸ್ಸಿನೊಳಗಿನವರಾಗಿದ್ದರು. ಸಂಖ್ಯಾಶಾಸ್ತ್ರದ ಪರೀಕ್ಷೆ ಆ ಎರಡೂ ಗುಂಪಿನ ನಡುವೆ ನಿಶ್ಚಳ ವ್ಯತ್ಯಾಸ (ಪಿ<0.001) ತೋರಿಸುತ್ತದೆ.

 2. ಅರ್ಥಿಗಳ ಲಿಂಗ:

            ಹೆಚ್ಚಿನ ಪುರುಷರು (ಶೇ. 55ಕ್ಕೂ ಮಿಗಿಲಾಗಿ) ಗುಂಪು 1ಕ್ಕೆ ಸೇರಿದವರು.  ಆದರೆ ಹೆಚ್ಚಿನ ಮಹಿಳೆಯರು (ಶೇ. 91ಕ್ಕೂ ಮಿಗಿಲಾಗಿ) ಗುಂಪು 2ಕ್ಕೆ ಸೇರಿದವರಾಗಿದ್ದರು. ಒಟ್ಟು ಗಂಡು:ಹೆಣ್ಣಿನ ಅನುಪಾತ 19:46 ಇತ್ತು. ಈ ತಥ್ಯಾಂಶದಿಂದ ದೃಢಪಡುವುದೇನೆಂದರೆ ಈ ರೋಗವು ಹೆಚ್ಚಾಗಿ ಸಣ್ಣ ವಯಸ್ಸಿನ ಹೆಣ್ಣು ಮಕ್ಕಳಲ್ಲಿ ಕಂಡು ಬರುತ್ತದೆಂದು. (ಪಿ.<0.01) 

3. ಶಿಕ್ಷಣ ಮಟ್ಟ:

            ಈ ಅಧ್ಯಯನದಲ್ಲಿ ಅನಕ್ಷರಸ್ಥರು ಶೇ. 46.15 ಇದ್ದರು. ಆದ್ದರಿಂದ ಅಥರ್ಿಗಳ ಶೈಕ್ಷಣಿಕ ಮಟ್ಟ 1980-1990ರಲ್ಲಿ ಭಾರತ/ಕರ್ನಾಟಕದಲ್ಲಿದ್ದ ಸಾರ್ವತ್ರಿಕ ಮಟ್ಟಕ್ಕೆ ಅನುಗುಣವಾಗಿತ್ತೆಂದು ಹೇಳಬಹುದು.

4. ಔದ್ಯೋಗಿಕ ಹಿನ್ನೆಲೆ:

            ಮಹಿಳೆಯರು ಪ್ರಮುಖವಾಗಿ ಗೃಹಿಣಿಯರಿದ್ದರು (ಶೇ.47.22). ನಂತರ ವ್ಯವಸಾಯ (ಶೇ.11.11), ಮತ್ತು ಕೂಲಿ (ಶೇ.11.11) ಕೆಲಸದಲ್ಲಿ ತೊಡಗಿದ್ದರು. ಆದರೆ ಪುರುಷರು ಹೆಚ್ಚಾಗಿ (ಶೇ.20.69) ದೇವಸ್ಥಾನಗಳಲ್ಲಿ ಅರ್ಚಕರಾಗಿದ್ದರು, ಇಲ್ಲವೆ ವ್ಯಾಪಾರ (ಶೇ.13.79)ದಲ್ಲಿ ತೊಡಗಿದ್ದರು.  ಮತ್ತೆ ಉಳಿದಂತೆ ಹೆಚ್ಚಿನ ಅರ್ಥಿಗಳು-ವಿದ್ಯಾರ್ಥಿ/ ಕುಶಲಕರ್ಮಿ/ಶ್ರದ್ಧಾಚಿಕಿತ್ಸಕರು ಅಥವಾ ನಿರುದ್ಯೋಗಿಗಳಾಗಿದ್ದರು

5. ಅರ್ಥಿಗಳ ಕುಟುಂಬದ ಇತಿಹಾಸ:

            ಗುಂಪು 1ರ ಶೇ.55.67ರಷ್ಟು ಜನ ತಮ್ಮ ಕುಟುಂಬದಲ್ಲಿ ಹಿಂದಿನಿಂದ ಈ ವರ್ತನೆಯ ಇತಿಹಾಸ ಇತ್ತೆಂದರು.  ಆದರೆ ಗುಂಪು 2ಕ್ಕೆ ಸೇರಿದ ಹೆಚ್ಚಿನ (ಶೇ.77.78) ಜನ ತಮ್ಮ ಕುಟುಂಬದ ಇತಿಹಾಸದಲ್ಲಿ ಈ ವರ್ತನೆಯು ಇರಲಿಲ್ಲವೆಂದರು.

6. ಭೂಗೋಳಿಕ ಹಿನ್ನೆಲೆ:  

            ದತ್ತಾಂಶದ ಪ್ರಕಾರ ಗುಂಪು 1ರ ಹೆಚ್ಚಿನ (ಶೇ.51.72) ಪ್ರತಿವಾದಿಗಳು ನಗರ ಪ್ರದೇಶಕ್ಕೆ, ಹಾಗೂ ಗುಂಪು 2ರ ಹೆಚ್ಚಿನ (ಶೇ.66.67) ಪ್ರತಿವಾದಿಗಳು ಗ್ರಾಮೀಣ ಪ್ರದೇಶಕ್ಕೆ ಸೇರಿದವರಾಗಿದ್ದರು.  ಆದರೆ ಈ ವ್ಯತ್ಯಾಸ ಸಂಖ್ಯಾಶಾಸ್ತ್ರದ ವಿಶ್ಲೇಷಣೆಯ ಪ್ರಕಾರ ಮಹತ್ವ ಪಡೆದಿಲ್ಲ. ಆದ್ದರಿಂದ ಎರಡೂ ವಿದಧ ವೈಪರಿತ್ಯವನ್ನು ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲೂ ಕಾಣಬಹುದು ಎಂದು ಹೇಳಬಹುದು.  ಆದರೆ ಈ ಅಧ್ಯಯನದಲ್ಲಿ ಕಂಡು ಬಂದ ಪ್ರಮುಖ ವಿದ್ಯಮಾನವೆಂದರೆ ಪ್ರಾದೇಶಿಕ ವಲಯದಲ್ಲಿ ಎರಡು ವಿಧದ ಅಭಿವ್ಯಕಿಯಲ್ಲಿ ಭಾರೀ ವ್ಯತ್ಯಾಸ ಕಂಡು ಬರುತ್ತದೆ. ದಕ್ಷಿಣ ಭಾಗದ ಕರ್ನಾಟಕದಲ್ಲಿ ಗುಂಪು 1ರ ಅರ್ಥಿಗಳ ಸಂಖ್ಯೆ ಶೇ.80ಕ್ಕಿಂತ ಹೆಚ್ಚಿತ್ತು, ಆದರೆ ಗುಂಪು 2ರ ಹೆಚ್ಚಿನ (ಶೇ.80) ಅರ್ಥಿಗಳು ಉತ್ತರ ಕರ್ನಾಟಕಕ್ಕೆ ಸೇರಿದವರಾಗಿದ್ದರು. ಆದ್ದರಿಂದ ಇಲ್ಲಿ ನಾವು ನಿಸ್ಸಂದೇಹವಾಗಿ ಪ್ರತಿವಾದಿಗಳ ಪ್ರಾದೇಶಿಕ ಹಿನ್ನೆಲೆ, ಅಲ್ಲಿಯ ನಂಬಿಕೆ, ಆಚರಣೆಗಳ ಪ್ರಭಾವವು ಜನರು ಯಾವ ವಿಧದ ರೋಗಕ್ಕೆ ಬಲಿಯಾಗುತ್ತಾರೆಂಬುದನ್ನು ನಿರ್ಧರಿಸುತ್ತದೆಂದು ಹೇಳಬಹುದು.    

7. ಧಾರ್ಮಿಕ ನಂಬಿಕೆ ಮತ್ತು ಆಚರಣೆಗಳು:

            ಭಾರತೀಯರು ಸನಾತನ ಧರ್ಮ, ನಂಬಿಕೆ, ಆಚರಣೆಗಳಲ್ಲಿ ತಲೆತಲಾಂತರಗಳಿಂದ ನಂಬಿಕೆ ಇಟ್ಟುಕೊಂಡು ಜೀವನ ನಡೆಸುತಿದ್ದಾರೆ. ಜನರು ತಮ್ಮ ಕಷ್ಟ, ಸುಖಗಳಿಗೆ ಅಗೋಚರ ಶಕ್ತಿಗಳು, ವಿಧಿ, ಕಾರಣವೆಂದು ನಂಬಿರುತ್ತಾರೆ. ಈ  ಶಕ್ತಿಗಳಿಗೆ ಕೋಪಬರದಂತೆ ಸಂತೋಷ ಪಡಿಸಲು ಅನೇಕ ರೀತಿಯ ಪೂಜೆ, ಪುರಸ್ಕಾರ, ಸಂಸ್ಕಾರ, ವ್ರತ, ನಿಯಮಗಳನ್ನು ಆಚರಿಸುತ್ತಾರೆ.

ಭಾಗ 2

1. ಸಾಧೀನ (ದೈವಾವೇಶ) ವರ್ತನಾ ಘಟನೆಗಳ ವಿವರಣೆ:

            ದೈವಾವೇಶದಲ್ಲಿರುವಾಗ ಅವರ ವರ್ತನೆಯು ಹೇಗೆ ಇರುತ್ತದೆ ಎಂಬುದನ್ನು ವಿಚಾರಿಸಿದಾಗ/ ಅವಲೋಕಿಸಿದಾಗ ಎರಡು ಗುಂಪಿನ ನಡುವೆ ಸ್ಪಷ್ಟ ವ್ಯತ್ಯಾಸ ಈ ಕೆಳಗಿನಂತೆ ಕಂಡು ಬಂತು. ಆ ಸಮಯದಲ್ಲಿ ಗುಂಪು 1ರ ಮಾಹಿತಿದಾರರು- ಆ ಸ್ಥಳದಲ್ಲಿ ನೆರೆದಿರುವರಿಗೆ ಸಲಹೆ ನೀಡುವುದು (ಶೇ.89.66), ನಾಟಕೀಯವಾಗಿ ಮಾತನಾಡುವುದು (ಶೇ.41.38), ವಿಶಿಷ್ಟ ಭಂಗಿ (ಶೇ.34.48) ಯಲ್ಲಿರುವ ವರ್ತನೆಯನ್ನು ತೋರಿಸಿದರೆ, ಗುಂಪು 2ರ ಮಾಹಿತಿದಾರರಲ್ಲಿ ಬೈದಾಡುವುದು (ಶೇ.80.56), ಅತ್ತಿಂದಿತ್ತ ತೂರಾಡುವುದು (ಶೇ.33.33), ಉರುಳಾಡುವುದು, ಜೋರಾಗಿ ಧ್ವನಿ ಎತ್ತಿ ಮಾತನಾಡುವ ವರ್ತನೆಯು ಸಾಮಾನ್ಯವಾಗಿತ್ತು. 

            ಇಂತಹ ಘಟನೆಗಳು ಮಾಹಿತಿದಾರರಲ್ಲಿ ಎಷ್ಟು ದಿನಗಳಿಗೊಮ್ಮೆ ಪುನರಾವರ್ತನೆ ಆಗುತ್ತದೆ ಎಂದಾಗ ಕುತೂಹಲಕಾರಿಯಾದ ಮತ್ತು  ಭಿನ್ನವಾದ ಉತ್ತರ ಸಿಕ್ಕಿದೆ. ಗುಂಪು 1ರ ಶೇ. 41ಕ್ಕೂ ಹೆಚ್ಚಿನ ಜನರು ಈ ಘಟನೆಯು ವಾರಕ್ಕೆ ಎರಡು ದಿನ ಕಾಣಿಸಿಕೊಳ್ಳುತ್ತದೆ ಎಂದರು. ಅದರಲ್ಲೂ ಹೆಣ್ಣು ದೈವವಾದರೆ ಪ್ರತೀ ಮಂಗಳವಾರ ಮತ್ತು ಶುಕ್ರವಾರ, ಅದೇ ಗಂಡು ದೈವವಾದರೆ ಪ್ರತೀ ಬುಧವಾರ, ಮತ್ತು ಭಾನುವಾರ ಕಾಣಿಸಿಕೊಳ್ಳುತ್ತೆ ಎಂದರು. ಆದರೆ ಗುಂಪು 2ರ ಮಾಹಿತಿದಾರರು ಹೆಚ್ಚಾಗಿ (ಶೇ. 52) ಹದಿನೈದು ದಿನಗಳಿಗೊಮ್ಮೆ ಮರುಕಳಿಸುತ್ತದೆಯೆಂದರು.

ಊ. ದೈವಾವೇಶ ಘಟನೆಗಳ ಕುರಿತು ಮಾಹಿತಿದಾರರ ಭಾವನೆ:

            ಈ ವಿಷಯಕ್ಕೆ ಸಂಬಂಧಿಸಿದಂತೆಯೂ ಎರಡು ಗುಂಪಿನ ಅರ್ಥಿಗಳಲ್ಲಿ ವ್ಯತ್ಯಾಸ ಕಂಡು ಬಂತು. ಗುಂಪು 1ರ ಸದಸ್ಯರು ಹೆಚ್ಚಾಗಿ (ಶೇ. 86.21) ಸಂತೋಷ ವ್ಯಕ್ತಪಡಿಸಿದರೆ, ಗುಂಪು 2ರಲ್ಲಿ ಹೆಚ್ಚಿನವರು (ಶೇ.83.33)  ತಮ್ಮ ಈ ವೈಪರಿತ್ಯ ಘಟನೆಗಳ ಬಗ್ಗೆ ಚಿಂತೆ ಕಾಣಿಸಿಕೊಂಡಿತು ಎಂದಿದ್ದಾರೆ.

            ಈ ಅಸಾಮಾನ್ಯ ಘಟನೆಗಳ ನಿವಾರಣೆಗಾಗಿ ಕೈಗೊಂಡ ಕ್ರಮಗಳು ಸಹ ಆ ಗುಂಪಿನ ಅನುಭವ ಮತ್ತು ಭಾವನೆಗಳಿಗೆ ತಕ್ಕಂತೆ ಇತ್ತು. ಗುಂಪು 1ರ ಮಾಹಿತಿದಾರರು ಹೆಚ್ಚಾಗಿ (ಶೇ. 89.66) ದೇವಸ್ಥಾನ/ಪುಣ್ಯಕ್ಷೇತ್ರಗಳಿಗೆ ಮೊರೆ ಹೋಗಿದ್ದಾರೆ. ಆದರೆ ಗುಂಪು ಎರಡರ ಮಾಹಿತಿದಾರರು ಹೆಚ್ಚಾಗಿ (ಶೇ. 63.89) ಸಾಂಪ್ರದಾಯಿಕ ಚಿಕಿತ್ಸಕರ ಬಳಿ, ಮತ್ತು ಶೇ.52.78ರಷ್ಟು ಸದಸ್ಯರು ದೇವಸ್ಥಾನ/ಪುಣ್ಯ ಕ್ಷೇತ್ರಗಳಿಗೆ ಭೇಟಿ ನೀಡಿದ್ದಾರೆ. ನಂತರ ಶೇ.24.14 (ಗುಂಪು 1) ಮಾಹಿತಿದಾರರು ಈ ಅಪಸಾಮಾನ್ಯ ಘಟನೆಗಳ ನಿವಾರಣೆಗಾಗಿ, ಉದಾಸೀನತೆ, ಅಪಮಾನ ಮಾಡುವುದು. ಆತ್ಮದ ಬೇಡಿಕೆ ಪೂರೈಕೆ, ಇತ್ಯಾದಿ ಕ್ರಮಗಳನ್ನು ಕೈಗೊಂಡಿದ್ದಾಗಿ ತಿಳಿಸಿರುತ್ತಾರೆ.

            ನಿವಾರಣಾ ಕ್ರಮಗಳಿಂದ ಉಂಟಾದ ಪರಿಣಾಮವನ್ನು ತಿಳಿಯಲು ಪ್ರಯತ್ನಿಸಿದಾಗ ತಿಳಿದು ಬಂದಿದ್ದೇನೆಂದರೆ, ಕೇವಲ ಗುಂಪು 2ರ ಶೇ. 11.11ರಷ್ಟು ಜನರು ಮಾತ್ರ ಸಂಪೂರ್ಣವಾಗಿ ಅಪಸಾಮಾನ್ಯ ವರ್ತನೆಯಿಂದ ಮುಕ್ತಿ ಹೊಂದಿದ್ದರು. ಮತ್ತು ಶೇ. 27.78ರಷ್ಟು ಜನರು ಅರ್ಧ ಭಾಗದಷ್ಟು ಗುಣಮುಖ ಹೊಂದಿದ್ದರು.  ಆದರೆ ಅತೀ ಹೆಚ್ಚಿನ ಸಂಖ್ಯೆಯಲ್ಲಿ ಅಂದರೆ ಶೇ.44.44ರಷ್ಟು ಜನರಲ್ಲಿ ಯಾವುದೇ ರೀತಿಯ ಶಮನವು ಕಂಡು ಬರಲಿಲ್ಲವೆಂದು ಅಭಿಪ್ರಾಯಪಟ್ಟರು. ಅದೇ ಗುಂಪು 1ರ ಶೇ.75.87 ರಷ್ಟು ಜನರು ಈ ವರ್ಗಕ್ಕೆ (ಶೂನ್ಯ ಶಮನ) ಸೇರಿದವರಾಗಿದ್ದರು.

ಪರಿಸಮಾಪ್ತಿ:

            ಪ್ರಸಕ್ತ ಅಧ್ಯಯನದ ದತ್ತಾಂಶಗಳ ಆಧಾರದ ಮೇಲೆ ಸ್ವಾಧೀನತೆ (ದೈವಾವೇಶ) ಘಟನೆಗಳನ್ನು ವ್ಯಕ್ತಿ  ತನ್ನ ಸಂಕಟ/ಒತ್ತಡ ಸನ್ನಿವೇಶಗಳೊಂದಿಗೆ ಹೊಂದಿಕೊಳ್ಳಲು ಕಲಿತುಕೊಂಡ/ಅರ್ಜಿತ ವರ್ತನೆಯ ರೀತಿ ಎಂದು ಅರ್ಥೈಸಿಕೊಳ್ಳಬಹುದು. ಈ ಘಟನಾವಳಿಯು ಮುಂಚಿನಿಂದಲೇ ಕೆಲವೊಂದು ಪೂರಕ ಅಂಶಗಳನ್ನು ಹೊಂದಿದಂತಹ ವ್ಯಕ್ತಿಗಳಲ್ಲಿ ಕಾಣಿಸಿಕೊಳ್ಳುತ್ತದೆ.  ಆ ಅಂಶಗಳೆಂದರೆ - ಪ್ರಭಾವಿತಗೊಳ್ಳುವ ವಯಸ್ಸು, ವಿವಿಧ ಪರ್ವಕಾಲದಲ್ಲಿರುವ ಸಣ್ಣ ವಯಸ್ಸಿನ ಹೆಣ್ಣುಮಕ್ಕಳು, ಈ ಜನರು ಅನುಸರಿಸುವ ಧಾರ್ಮಿಕ ನಂಬಿಕೆ ಮತ್ತು ಆಚರಣೆಗಳು, ಯುವಕರು/ಯುವತಿಯರು ಜೀವನದಲ್ಲಿ ಅನುಭವಿಸಿದ ಪರಿಹಾರವಾಗದ ಮನೋಸಾಮಾಜಿಕ ಮತ್ತು/ಅಥವಾ ಮನೋ-ದೈಹಿಕ ಒತ್ತಡ ಸನ್ನಿವೇಶಗಳು, ಮತ್ತು ದೈವಾವೇಶವನ್ನು ಒಪ್ಪುವಂತಹ, ಪ್ರಚೋದನಾಕಾರಿ ವಾತಾವರಣಕ್ಕೆ ಆ ನೊಂದ ಜನರನ್ನು ಗುರಿಪಡಿಸಿದಾಗ/ಪರಿಚಯಿಸಿದಾಗ, ಅವರಲ್ಲಿ ಆ ಸನ್ನಿವೇಶಕ್ಕೆ ಒಪ್ಪುವಂತಹ ದೈವಾವೇಶ (ಐಚ್ಛಿಕ/ಅನೈಚ್ಛಿಕ) ವರ್ತನೆಯು ಪ್ರಕಟವಾಗುತ್ತದೆ.  ಹಾಗೂ ಈ ವರ್ತನೆಗಳಿಗೆ ವ್ಯಕ್ತಿಯ ಪರಿಸರದಲ್ಲಿ ಎಲ್ಲಿಯವರೆಗೆ ಪುನರ್ಪುಷ್ಟಿಕರಣ ದೊರಕುತ್ತದೆಯೋ, ಅಲ್ಲಿಯವರೆಗೆ ಮಾತ್ರ ಈ ಘಟನೆಗಳು ಪುನರಾವರ್ತನೆಗೊಳ್ಳುತ್ತಿರುತ್ತದೆ. 

ಆಧಾರ ಗ್ರಂಥಗಳು:

1. ಅಬ್ದುಲ್ ರೆಹಮಾನ್ ಪಾಷ ಮತ್ತು ಎಸ್. ನಾಗವೇಣಿ. (ಸಂ.) (2001): ‘ನವಕರ್ನಾಟಕ ಪದಕೋಶ', ನವ ಕರ್ನಾಟಕ ಪಬ್ಲಿಕೇಶನ್ಸ್ ಪ್ರೈವೆಟ್ ಲಿಮಿಟೆಡ್, ಬೆಂಗಳೂರು -1                                                                                                                                                                                                                                                                                                                                                                                                                                                                                                                       

2. ಚಂದ್ರಶೇಖರ್ ದಾಮ್ಲೆ (ಸಂ.)(2003): ‘ಸಮಾಜ ವಿಜ್ಞಾನಗಳ ಪಾರಿಭಾಷಿಕ ಪದಕೋಶ', ಪುಬ್ಲಿಶಿಡ್ ಬೈ ದ ಡೈರೆಕ್ಟರ್, ಪ್ರಸಾರಂಗ, ಕನ್ನಡ ವಿಶ್ವವಿದ್ಯಾಲಯ, ಹಂಪಿ-583276. ಮತ್ತು ಇತರೆ.                            

ಡಾ|| ಶೋಭಾದೇವಿ, ಆರ್. ಪಾಟೀಲ್,

                                   ಪ್ರಾಧ್ಯಾಪಕರು, ಸಮಾಜಕಾರ್ಯ ವಿಭಾಗ, ಕರ್ನಾಟಕ ವಿಶ್ವವಿದ್ಯಾಲಯ